Nýtt deiliskipulag Flensborgarhafnar gerir ráð fyrir 3-4 hæða fjölbýlishúsi þar sem nú er fjölfarið hringtorg fyrir framan verslun Krónunnar. Fulltrúar Samfylkingarinnar í skipulags- og byggingaráði taka undir athugasemdir Vegagerðarinnar sem hvetur Hafnarfjarðarbæ til að fresta skipulagsvinnunni þar til útfærsla umferðarmála á svæðinu liggur fyrir.
Útfærsla samgangna á svæðinu ólokið
Deiliskipulagstillagan var samþykkt af fulltrúum meirihlutans í skipulags- og byggingaráði þann 30. apríl síðastliðinn og vísað til bæjarstjórnar til staðfestingar. Meðal gagna málsins var athugasemd frá Vegagerðinni þar sem kemur fram að útfærslu samgangna á svæðinu sé ólokið og þar með liggi ekki fyrir endanleg rýmisþörf samgöngumannvirkja. Hvetur Vegagerðin Hafnarfjarðarbæ til þess að bíða með skipulagsbreytingar á svæðinu þar til þessari vinnu er lokið.
Fulltrúar Samfylkingarinnar tóku undir athugasemd Vegagerðarinnar og bentu á að hún sé í samræmi við tillögur flokksins í skipulags- og byggingaráði og í bæjarstjórn, um að málinu sé frestað þar til lausn sé fundin á fyrirséðum umferðarvanda á svæðinu. Vísa fulltrúar Samfylkingarinnar í samgöngugreiningu Eflu þar sem kemur fram að samgöngukerfið á svæðinu sé komið að þolmörkum.
Gríðarleg uppbygging fyrirhuguð
Bærinn okkar hefur áður fjallað um áform meirihluta Sjálfstæðis- og Framsóknarflokks um gríðarlega uppbyggingu við Suðurhöfn, þar sem þegar skapast mikil umferð á háannatímum. Núverandi áform um uppbyggingu á svæðinu gera ráð fyrir um 1.300 nýjum íbúðum ásamt annarri atvinnustarfsemi eins og hóteli, skrifstofum og nýjum Tækniskóla með allt að 5.000 nemendum og 500 starfsmönnum.
Umferðartalningar sýna að á síðustu tveimur árum hafi umferð um svæðið aukist um 15-20 prósent. Því má gera ráð fyrir að umferðin haldi áfram að aukast um 10 prósent á ári óháð því hvort verði af fyrirhugaðri uppbyggingu á svæðinu eða ekki. Af þessum sökum hafa fulltrúar Samfylkingarinnar í skipulags- og byggingaráði ítrekað lagt til að skipulagsbreytingum á svæðinu verði frestað þar til búið sé að finna lausn á umferðarvandanum.
