Ársreikningur Hafnarfjarðarbæjar fyrir árið 2025 sýnir versnandi stöðu bæjarsjóðs, en hann var rekinn með tæplega 1,2 milljarða tapi þrátt fyrir að tekjur hafi verið 1,4 milljörðum hærri en áætlanir gerðu ráð fyrir. Oddviti Samfylkingarinnar gagnrýnir lausatök í fjármálum bæjarins og segir mikilvægt að snúa hallarekstrinum við.
Skuldaviðmið ekki hærra frá 2019
Samkvæmt ársreikningnum er skuldaviðmið A-hluta bæjarsjóðs komið upp í 104 prósent, en fjárhagsáætlun gerði ráð fyrir að það yrði 96 prósent. Skuldaviðmiðið hefur ekki verið hærra frá árinu 2019, þegar það var 108 prósent. Það fór lægst í 84 prósent árið 2023 en hefur hækkað síðan. Skuldaviðmið er hlutfall heildarskulda og skuldbindinga (að frádregnum veltufjármunum) af reglulegum tekjum sveitarfélagsins.
Ársreikningurinn sýnir að á árinu 2025 hækkuðu skuldir og skuldbindingar bæjarins um 6,5 milljarða. Bærinn okkar sagði frá því á dögunum að samkvæmt fjárhagsáætlun ársins 2026 stendur til að skuldsetja bæinn um 4,5 milljarða til viðbótar á þessu ári til að fjármagna fyrirhugaðar fjárfestingar.
Tap þrátt fyrir hærri tekjur
Fjárhagsáætlun síðasta árs gerði ráð fyrir að tekjur bæjarins af sölu byggingaréttar yrðu tæpir 3 milljarðar króna. Samkvæmt ársreikningi voru þessar tekjur talsvert undir væntingum, eða aðeins 685 milljónir.
Heildartekjur Hafnarfjarðarbæjar voru hins vegar 1,4 milljarði hærri en áætlun ársins 2025 gerði ráð fyrir. Þrátt fyrir það var tapið á rekstrinum tæpir 1,2 milljarðar.
Hættumerkin blasa við
Ársreikningurinn var lagður fram á fundi bæjarráðs fimmtudaginn 16. apríl og verður til umræðu á bæjarstjórnarfundi miðvikudaginn 22. apríl. Guðmundur Árni Stefánsson, oddviti Samfylkingarinnar í bæjarstjórn Hafnarfjarðar, segir ársreikninginn undirstrika lausatök meirihluta Sjálfstæðis- og Framsóknarflokks. „Samfylkingin hefur varað við þessar öfugþróun, sem birtist m.a. í þeim staðreyndum að rekstur bæjarins er rekinn með halla, skuldir bæjarins hækka ár frá ári og þungar fjárhagslegar skuldbindingar blasa við í rekstri og þjónustu bæjarins,“ segir Guðmundur Árni.
Hann bendir á að bærinn sé rekinn með 1,2 milljarða halla, sem þýði einfaldlega að engir fjármunir séu til fjárfestinga heldur þurfi að ráðast í umtalsverðar lántökur. „Það er sama hvar borið er niður; alls staðar blasa hættumerkin við,“ bætir Guðmundur Árni við.
Verkefni jafnaðarmanna að snúa við hallarekstrinum
Guðmundur Árni segir þetta vera niðurstöðuna sem blasi við eftir 12 ára langa stjórnarsetu Sjálfstæðis- og Framsóknarflokks. „Það verður verkefni okkar jafnaðarmanna að snúa við þessum hallarekstri, þannig að Hafnarfjarðarbæjar geti staðið við skuldbindingar sínar, bætt þjónustu við bæjarbúa og ráðist í nauðsynlega uppbyggingu á komandi árum. Til þess að svo verði þarf öfluga Samfylkingu við stjórn bæjarins. Það þarf að gerast í kosningunum 16.maí næstkomandi. Og það mun gerast,“ segir Guðmundur Árni að lokum.
