Í vor lögðu bæjarfulltrúar Samfylkingarinnar fram tillögu um að fela bæjarstjóra að hefja viðræður við Betri samgöngur ohf. og Vegagerðina um aðgeðrir til að bæta umferðaröryggi gangandi og hjólandi vegfarenda á Reykjavíkurvegi. Tillagan var samþykkt. Hildur Rós Guðbjargardóttir, bæjarfulltrúi Samfylkingarinnar, bendir á að vegurinn sé varasamur ungmennum í norður- og vesturbæ sem sækja tómstundir yfir veginn.
Getum ekki beðið til 2040
Tillagan var fyrst lögð fram í bæjarstjórn síðasta haust. Þá bentu fulltrúar meirihlutans á að á Reykjavíkurvegi væru nú þegar þrenn gönguljós. Þá væri von á skýrslu frá Betri samgöngum ohf. um legu borgarlínu um veginn. Hildur Rós Guðbjargardóttir, bæjarfulltrúi Samfylkingarinnar, bendir á að samkvæmt áætlunum eigi borgarlínan ekki að tengjast Hafnarfirði fyrr en árið 2040. „Við getum ekki beðið í á annan áratug eftir því að öryggi barna og annarra óvarinna vegfarenda yfir Reykjavíkurveg verði bætt,“ segir Hildur Rós.
Hún bendir á að vegurinn sé varasamur ungmennum í norður- og vesturbæ, sem þurfa að sækja íþróttaæfingar, aðrar tómstundir eða þjónustu á hraunum eða austan Reykjavíkurvegar. „Þá mun á næstu árum byggjast upp íbúðahverfi í hraununum þar sem stefnt er að blandaðri byggð. Umferð mun því aukast verulega á svæðinu og börn á grunnskólaaldri koma til með að þurfa að þvera veginn í meira mæli en nú til þess að sækja skóla, íþróttir og tómstundir,“ bendir Hildur Rós á.
Ánægjulegt að samstaða náðist um málið
Eftir umræðu um málið í umhverfis- og framkvæmdaráði, þar sem Hildur Rós er fulltrúi, lögðu bæjarfulltrúar Samfylkingarinnar aftur fram tillögu um málið á bæjarstjórnarfundi 25. febrúar. Þá náðist samstaða um að fela bæjarstjóra að hefja þessar viðræður. „Við fögnum því að sjálfsögðu að meirihlutinn hafi komið til liðs við okkur í þessu mikilvæga máli sem snertir öryggi barnanna okkar,“ segir Hildur Rós.
