Í ár eru 40 ár liðin frá því að frambjóðendur Alþýðuflokksins í Hafnarfirði fóru í fyrstu rósagönguna fyrir sveitarstjórnarkosningar. Þessa dagana ganga frambjóðendur Samfylkingarinnar með rósir í hvert hús í bænum. Hluti hópsins sem tók þátt í fyrstu rósagöngunni árið 1986 hittist við kosningamiðstöð Samfylkingarinnar til að marka tímamótin.
Það var Hörður Zóphaníasson sem átti frumkvæðið að því að hvíla hefðbundinn kosningaáróður og dreifa rósum síðustu dagana fyrir sveitarstjórnarkosningar í Hafnarfirði, en rósin er alþjóðlegt merki jafnaðarstefnunnar. Í Alþýðublaði Hafnarfjarðar þann 4. júní 1986 segir að þessari nýbreytni hafi verið afbragðsvel tekið, en Alþýðuflokkurinn vann stórsigur í bæjarstjórnarkosningunum það ár og fékk sex bæjarfulltrúa kjörna.
4500 heimili heimsótt
Frambjóðendur og stuðningsfólk Samfylkingarinnar í Hafnarfirði hafa afhent 4.500 rósir á síðustu dögum kosningabaráttunnar. Guðmundur Árni Stefánsson, oddviti Samfylkingarinnar, segir þetta vera skemmtilegasta hluta baráttunnar. „Þetta er mikilvæg snerting við kjósendur og okkur er alltaf tekið vel, enda veit fólk fyrir hvað rósin stendur. Hafnfirðingar treysta okkur jafnaðarmönnum og eru sammála um að það er þörf á breytingum í Hafnarfirði,“ segir Guðmundur Árni.
