Handboltabærinn Hafnarfjörður ber svo sannarlega nafn með rentu þessa dagana. Undanúrslitaeinvígi Hafnarfjarðarliðanna Hauka og FH hófst með látum á þriðjudaginn þegar fyrsti leikurinn í einvíginu fór fram á heimavelli FH-inga í Kaplakrika. Hafnfirðingar fjölmenntu á völlinn og stuðningsmenn liðanna létu vel í sér heyra og stemningin var gríðarlega góð. Eftir mikla baráttu og hörkuleik þar sem jafnt var á flestum tölum sigu heimamenn í FH framúr á lokamínútunum og unnu 27-21 og eru því komnir með 1-0 forskot í einvíginu en þrjá sigurleiki þarf til þess að vinna einvígið og komast í úrslitaeinvígið um Íslandsmeistaratitilinn.
Veislan rétt að byrja
Það er því nóg eftir af handboltaveislunni í Hafnarfirði og hún heldur áfram í kvöld á Ásvöllum. Næsti leikur í einvíginu fer nefnilega fram á heimavelli Hauka á Ásvöllum í kvöld kl. 19:00. Á heimavelli munu Haukar vafalaust leggja allt í sölurnar til þess að jafna einvígið í kvöld en FH-ingar munu að sama skapi selja sig dýrt til þess að halda forystunni í einvíginu. Eitt er allavega ljóst að stálin stinn munu mætast í kvöld á Ásvöllum og leikmenn liðanna, sem og stuðningsmenn, munu gefa allt í leikinn.
Fjölmennum á völlinn
Stemningin og spennan verður mikil – e.t.v. óbærileg fyrir einhverja, en við hvetjum Hafnfirðinga til fjölmenna á Ásvelli og styðja liðið sitt. Það verður enginn svikinn af þessari veislu. Hafnarfjörður er vagga handboltans á Íslandi og gríðarlega gaman að fá viðureign FH og Hauka í úrslitakeppni handboltans sem sýnir að handboltabærinn Hafnarfjörður stendur svo sannarlega undir nafni.
