Samfylkingin í Hafnarfirði hefur sett í loftið rafræna könnun þar sem íbúum bæjarins gefst kostur á að senda inn hugmyndir og ábendingar um það sem má betur fara í bænum. Allar hugmyndir frá íbúum verða svo teknar saman og munu þær nýtast við að móta kosningastefnu Samfylkingarinnar fyrir komandi sveitarstjórnarkosningar. Oddviti flokksins segir þetta lið í eflingu íbúalýðræðis í bænum.
Samfylkingin hlusti á fólk
„Við viljum heyra frá bæjarbúum og fá það beint í æð hvað liggur þeim á hjarta í aðdraganda kosninga,“ segir Guðmundur Árni Stefánsson, oddviti Samfylkingarinnar í Hafnarfirði. „Í sveitarstjórnum er mikilvægt að kjörnir fulltrúar eigi gott og milliliðalaust talsamband við kjósendur og þetta er liður í því.“
Guðmundur Árni bendir á að Samfylkingin hafi verið leiðandi þegar kemur að íbúalýðræði í Hafnarfirði og hún ætli sér að halda því áfram. „Komumst við í meirihluta munum við leggja mun meiri áherslu á samtal og samráð við bæjarbúa en nú er gert,“ segir hann og bætir við: „Samfylkingin hlustar á fólk!“
Hægt er að taka þátt í mótun kosningastefnu Samfylkingarinnar með því að fylla út rafræna könnun hér.
