Eftir æsilega viðureign Hafnarfjarðarliðanna FH og Hauka í undanúrslitum Íslandsmóts karla í handbolta höfðu FH-ingar að lokum sigur í einvíginu 3-1. Þar með var FH komið áfram í úrslitin en Haukar féllu úr leik.
Í úrslitum mætir FH liði Vals, sem vann KA frá Akureyri í hinu undanúrslitaeinvíginu 3-0. Valur vann deildarmeistaratitilinn í vetur en FH hafnaði í 2. sæti deildarkeppninnar. Það er því ljóst að það stefnir í hörkurimmu milli þessara tveggja liða. Í deildarkeppninni í vetur unnu enda liðin sinn hvorn leikinn með litlum mun í bæði skipti.
Það er eins og í undanúrslitaeinvíginu að vinna verður þrjá leiki til að vinna Íslandsmeistaratitilinn eftirsótta og leikirnir gætu því orðið fimm í heildina. Valur er með heimavallarréttinn sem deildarmeistarar og fyrsti leikurinn fer fram í kvöld á Hlíðarenda og hefst hann kl. 19:30. Fyrsti heimaleikur FH verður svo á mánudaginn í Kaplakrika, sömuleiðis kl. 19:30.
Það er því útlit fyrir svakalega leiki í þessu einvígi og ljóst að hart verður tekist á. Við hvetjum alla FH-inga og Hafnfirðinga til að standa við bakið á okkar mönnum og styðja þá til sigurs.
