Kristrún Frostadóttir forsætisráðherra ásamt frambjóðendum Samfylkingarinnar á höfuðborgarsvæðinu kynntu í gær áherslur flokksins fyrir komandi sveitarstjórnarkosningar. Meginstefið í áherslum Samfylkingarinnar er „Tökum ábyrgð hvert á öðru“ og þar má finna tillögur í þágu barnafjölskyldna, eldra fólks og lítilla og meðalstórra fyrirtækja. Hildur Rós Guðbjargardóttir, bæjarfulltrúi Samfylkingarinnar, segir áherslurnar mikilvægar fyrir barnafjölskyldur í Hafnarfirði.
Vilja lækka kostnað barnafólks
Tillögur Samfylkingar um að lækka kostnað barnafólks fela meðal annars í sér þak á leikskólagjöld og 100% systkinaafslætti. Þá leggur flokkurinn til að réttur til leikskólavistar verði lögfestur frá því að fæðingarorlofi lýkur – með löggjöf og sameiginlegri fjármögnun ríkis og sveitarfélaga í skrefum á næstu 4 árum.
Tillögurnar gera ráð fyrir að engin fjölskylda greiði meira en 50 þúsund krónur á mánuði fyrir 40 tíma leikskólaviku – en að tekjulægri greiði minna. „Þannig hlífum við barnafjölskyldum við allt að 450 þúsund króna kostnaði á ári – ef miðað er við hið svokallaða Kópavogsmódel,“ sagði Kristrún Frostadóttir, forsætisráðherra, á kynningunni.
Í Hafnarfirði er systkinaafsláttur í dag 75% fyrir annað barn en 100% fyrir þriðja barn. Tillögur Samfylkingarinnar ganga út á að afslátturinn verði 100% strax með öðru barni í leikskóla.
Kristrún segir tíma til kominn að lögfesta rétt til leikskólavistar – líkt og gert hefur verið á öllum Norðurlöndum – til að brúa bilið milli fæðingarorlofs og leikskóla. „Til þess þarf nýja löggjöf og sameiginlega fjármögnun ríkis og sveitarfélaga.“
Lögfesting leikskólans mikilvægt skref
Hildur Rós Guðbjargardóttir, bæjarfulltrúi Samfylkingarinnar, segir um mikilvægar tillögur að ræða fyrir barnafjölskyldur í Hafnarfirði.
„Það þarf að breyta leikskólakerfinu og þeir plástrar sem sveitarfélög hafa verið að setja á kerfið hingað til hafa ekki verið að virka. Í leikskólum fer fram mikilvæg kennsla og þess vegna þurfum við að lögfesta leikskólastigið. Við vitum að slíkt þarf að gera í samtali við kennarastéttina og góðu samráði ríkis og sveitarfélaga,“ segir Hildur Rós.
„Þá viljum við í Samfylkingunni að kostnaður við leikskólavist barna sé ekki sligandi fyrir barnafjölskyldur og kostnaðinum við kerfisbreytingar sé ekki velt yfir á einstæða foreldra og fólk í lægstu tekjuhópunum eins og sum sveitarfélög hafa gert,“ bætir Hildur Rós við.
Því til viðbótar er lagt til að öllum börnum og ungmennum verði boðið frítt í Strætó og að haldið verði áfram að efla frístundastyrki við barnafjölskyldur til að ýta undir virka þátttöku í íþrótta- og tómstundastarfi um land allt.
Hildur segir Samfylkinguna hafa barist fyrir því að hafnfirsk börn fái frítt í strætó allt kjörtímabilið. „Þeirri tillögu hefur meirihluti Sjálfstæðisflokks og Framsóknar hafnað við afgreiðslu hverrar einustu fjárhagsáætlunar á kjörtímabilinu.“
Þá hafi Hafnarfjörður, undir forystu jafnaðarmanna, verið fyrsta sveitarfélag landsins til að innleiða frístundastyrki. „Frístundastyrkir í Hafnarfirði hafa því miður ekki haldið í við verðlag og verðbólgu en til þess þyrftu þeir að vera 70 til 75 þúsund krónur,“ segir Hildur. Frístundastyrkur barna er 70 þúsund krónur í Kópavogi, 75 þúsund í Reykjavík en aðeins 65 þúsund í Hafnarfirði.
Vilja hlúa að fólkinu sem byggði landið
Til að hlúa að fólkinu sem byggði landið boðar Samfylkingin áframhaldandi þjóðarátak í umönnun eldra fólks og uppbyggingu yfir 1.500 hjúkrunarrýma (samkvæmt framkvæmdaáætlun til 2030) – þannig að árið 2027 verði búið að helminga biðlistann eftir hjúkrunarrýmum og að árið 2030 sé miðað við að biðlistinn verði kominn niður í 100 manns en að sá hópur fái biðrými og enginn bíði lengur en 90 daga.
„Við erum að tækla biðlistann sem tvöfaldaðist frá árinu 2017 og við erum nú þegar á réttri leið með stórfelldri fjölgun hjúkrunarrýma,“ sagði Kristrún Frostadóttir á kynningunni í gær.
Þá hyggst Samfylkingin stórefla þjónustu við eldra fólk í heimahúsum með því að bjóða samfellda þjónustu við eldra fólk sem felst meðal annars í samþættingu heimaþjónustu, heimahjúkrunar og öldrunarráðgjafar– sem fylgir þörfum hvers og eins (þar með talið fyrir heimilishjálp, félagsstarf, heilsueflingu, dagdvalir, iðju- og sjúkraþjálfun o.s.frv.).
Guðmundur Árni Stefánsson, oddviti Samfylkingarinnar í bæjarstjórn Hafnarfjarðar, segir að flokkurinn hafi lagt ríka áherslu á hagsmuni eldra fólks í bænum á yfirstandandi kjörtímabili og muni gera það áfram.
„Við höfum lagt áherslu á það í bæjarstjórn að tillögur starfshóps um uppbyggingu íbúða fyrir eldra fólk á Sólvangsreitnum nái fram að ganga,“ segir Guðmundur Árni og bætir við: „Þeim tillögum hefur meirihluti Sjálfstæðisflokks og Framsóknar hafnað þó þeir hafi sjálfið lofað því fyrir síðustu kosningar að reisa íbúðir fyrir eldra fólk á Sólvangsreitnum! Þar liggur munurinn á þeim og okkur jafnaðarmönnum: við gerum það sem við segjum.“
Vilja einfalda rekstur og uppbyggingu
Tillögur Samfylkingar til að auðvelda rekstur og uppbyggingu snúa meðal annars að því að einfalda leyfisveitingar og regluverk — eins og Samfylkingin hefur gert markvisst á fyrsta ári í ríkisstjórn. Leyfisferli verði einfölduð og sameinuð, dregið verði úr kvöðum við að afla umsagna og skýr tímamörk sett á afgreiðslu leyfisveitinga.
„Við höfum ráðist í stórfellda einföldun á regluverki á fyrsta ári okkar í ríkisstjórn og við viljum gera það sama í sveitarstjórnum um allt land. Treystum frumkvöðlum og fyrirtækjum til að fara strax af stað og hefja rekstur — en veitum leiðsögn um úrbætur þegar þörf er á,“ sagði Jónas Már Torfason, oddviti Samfylkingar í Kópavogi og formaður stýrihóps Samfylkingar um daglega lífið.
Samfylkingin leggur einnig til að komið verði upp einum viðkomustað fyrir fyrirtæki hjá hverju sveitarfélagi, þar sem fyrirtæki hafi fastan tengipunkt til halds og trausts. Þá verði haldið áfram að létta á kerfinu með fækkun ríkisstofnana um 15% á kjörtímabilinu, til að auka hagræði og bæta þjónustu við fólk og fyrirtæki.
