Fæstar íbúðir í byggingu í Hafnarfirði

Í Hafnarfirði voru 122 íbúðir í byggingu í september sem samsvarar 3% íbúða í byggingu á höfuðborgarsvæðinu.

Samkvæmt nýrri talningu Samtaka Iðnaðarins (SI) þá voru 4.845 íbúðir í byggingu á höfuðborgarsvæðinu í september. Það er aukning upp á 18% frá því í mars á þessu ári. Í Hafnarfirði voru 122 íbúðir í byggingu í september sem samsvarar 3% íbúða í byggingu á höfuðborgarsvæðinu. Íbúðum í byggingu hefur því hlutfallslega fækkað um 19% í Hafnarfirði frá því í mars. Einungis Seltjarnarnes er með færri íbúðir í byggingu en Hafnarfjörður en í greiningu SI er tekið fram að það sé vegna landleysis. Í spá SI um fullbúnar íbúðir á tímabilinu 2018 – 2020 rekur Hafnarfjörður einnig lestina fyrir utan Seltjarnarnes. Spáin gerir ráð fyrir 4% vexti á þessu tímabili í Hafnarfirði á meðan spáin gerir ráð fyrir 8% vexti að meðaltali á höfuðborgarsvæðinu. Bæjarfulltrúi Samfylkingarinnar telur stöðuna algjörlega óásættanlega en að hún endurspegli viðhorf Sjálfstæðisflokksins til húsnæðisvandans. Hann bendir á að skortur á framboði af húsnæði á viðráðanlegum kjörum þýði að ungt fólk geti ekki flutt að heiman og valdi því að fólk festist á erfiðum og ófullburða leigumarkaði.

Friðþjófur Helgi Karlsson bæjarfulltrúi Samfylkingarinnar

Flestar íbúðir í byggingu í Reykjavík

Tæplega helmingur allra íbúða í byggingu á höfuðborgarsvæðinu er í Reykjavík eða 2355 íbúðir. Á sama tíma er þetta hlutfall 3% í Hafnarfirði. Á milli talninga hefur mesta hlutfallslega aukningin á íbúðum í byggingu orðið í Reykjavík eða um 36%. En í Hafnarfirði hefur hins vegar orðið hlutfallsleg fækkun á íbúðum í byggingu upp á 19%. Friðþjófur Helgi Karlsson, bæjarfulltrúi Samfylkingarinnar og fulltrúi í Umhverfis – og framkvæmdaráði, segir það mikil vonbrigði að staðan í Hafnarfirði hafi versnað frá því í mars. „Auðvitað var sú staða sem kynnt var af Samtökum Iðnaðarins hér í mars  algjörlega óásættanleg. Þess vegna eru það gríðarleg vonbrigði að staðan hafi ekki batnað síðan þá heldur kemur í ljós að íbúðum í byggingu hefur fækkað hlutfallslega um 19% á þessum tíma. Það er greinilegt að við verðum að spýta í lófana og snúa þessari þróun við,“ segir Friðþjófur Helgi um niðurstöður talningar SI.

 

Áhuga – og getuleysi Sjálfstæðisflokksins

 Í spá SI um fullbúnar íbúðir á tímabilinu 2018-2020 er gert ráð fyrir mestri aukningu í Mosfellsbæ eða 27% fjölgun fullbúinna íbúða. Á eftir Mosfellsbæ kemur Garðabær með tæplega 16% fjölgun og Kópavogur með 13%. Í Reykjavík er gert ráð fyrir u.þ.b. 6% vexti en Hafnarfjörður rekur lestina á meðal þessara sveitarfélaga þar sem gert er ráð fyrir 4% vexti á fyrrnefndu tímabili. Friðþjófur Helgi Karlsson segir stöðuna grafalvarlega og að útlitið sé ekki bjart fyrir fólk sem vill öðlast húsnæðisöryggi í Hafnarfirði. „Vandinn sem blasir við er grafalvarlegur. Ungt fólk getur ekki flutt að heiman og fólk er fast á erfiðum og ófullburða leigumarkaði vegna þess að uppbyggingin er of hæg og það er skortur á íbúðum á viðráðanlegum kjörum. Sjálfstæðisflokkurinn í Hafnarfirði hefur stýrt bænum núna í rúm fjögur ár og hann hefur haft fjölmörg tækifæri til að taka á málunum. Í upphafi síðasta kjörtímabils var staðan í Hafnarfirði hvað varðar lóðaframboð hvað best í Hafnarfirði og þess vegna er það alveg sérstakt rannsóknarefni hvers vegna uppbyggingin hefur verið svona hæg í Hafnarfirði. Getu – og áhugaleysi Sjálfstæðisflokksins veldur því að Hafnarfjörður hefur ekki staðið vaktina í glímunni við húsnæðisvandann,“ segir Friðþjófur Helgi í samtali við vefinn um niðurstöður talningar Samtaka Iðnaðarins.

 

Íbúðir í byggingu skv. talning SI

Sveitarfélag Sept. 2017 Mars 2018 Sept. 2018
Reykjavík 1,509 1,726 2,355
Kópavogur 900 1,048 1,161
Garðabær 607 594 651
Mosfellsbær 513 550 541
Hafnarfjörður 170 150 122
Seltjarnarnes 35 25 15
Samtals höfuðborgarsvæðið 3,734 4,093 4,845

Heimild: Samtök Iðnaðarins

 

Spá SI um fullbúnar íbúðir

Sveitarfélag 2018 2019 2020
Reykjavík 880 941 1,199
Kópavogur 490 533 661
Garðabær 307 328 240
Mosfellsbær 260 330 375
Hafnarfjörður 120 80 210
Seltjarnarnes 27 14 10
Samtals höfuðborgarsvæðið 2,084 2,226 2,695

Heimild: Samtök Iðnaðarins

 



Flokkar:Uncategorized

%d bloggurum líkar þetta: