Bæjarbúar borga fyrir opnuviðtal við oddvita Sjálfstæðisflokksins

Opnuviðtal við Rósu Guðbjartsdóttur, oddvita Sjálfstæðisflokksins, í aukablaði með Fréttablaðinu í dag var kostað af Hafnarfjarðarbæ. Samskiptastjórinn sem nýverið var í viðtali við málgagn Sjálstæðisflokksins í Hafnarfirði, Hamar, tók ákvörðun um að greiða fyrir viðtalið. Bæjarfulltrúi Samfylkingarinnar gerir alvarlegar athugasemdir við þessi vinnubrögð.

IMG_2162

Eflaust hafa flestir tekið eftir því að inni í Fréttablaðinu í dag fylgdi sérstakt aukablað um Hafnarfjörð. Í því var opnuviðtal við Rósu Guðbjartsdóttur, oddvita Sjálfstæðisflokksins í bæjarstjórn og leiðtoga flokksins fyrir bæjarstjórnarkosningarnar 26. maí. næstkomandi. Samkvæmt upplýsingum sem minnihlutinn fékk síðdegis í dag þá greiddi bærinn 250 þús. kr. fyrir opnuviðtalið við téðan oddvita Sjálfstæðisflokksins. Ákvörðun um þetta var tekin af samskiptastjóra bæjarins, Einari Bárðasyni. Einar var ráðin í starf samskiptastjóra í fyrra án þess að starfið væri auglýst. Athygli vakti einnig fyrir skemmstu að viðtal var við samskiptastjórann í síðasta tölublaði málgagns Sjálfstæðisflokksins í Hafnarfirði, Hamri. Ekki er vitað til þess að upplýsinga – eða samskiptastjóri hjá Hafnarfjarðarbæ hafi áður tekið þátt í kosningabaráttu til bæjarstjónar með þessum hætti.

Eðlileg meðferð á almannafé?
Gunnar Axel Axelsson bæjarfulltrúi Samfylkingarinnar segir að þetta veki upp spurningar um meðferð Sjálfstæðisflokksins á almannafé. „Það eru eflaust skiptar skoðanir á því hvort samskiptastjóri bæjarins eigi að koma með svo beinum hætti að kosningabaráttu eins flokks í bænum en hann hefur svosem ekki farið leynt með stjórnmálaskoðanir sínar hingað til. En hins vegar verður að spyrja þeirrar spurningar hvort það sé eðlilegt að samskiptastjórinn taki ákvörðun um það að bærinn greiði fyrir opnuviðtal við oddvita flokksins sem borið er í öll hús í bænum. Er það hlutverk bæjarins að borga fyrir kosningabaráttu Sjálfstæðisflokksins? Það er í það minnsta fullkomlega eðlilegt að fólk spyrji sig þeirrar spurningar í aðdraganda kosningar hvort þetta sé eðlileg meðferð á almannafé,“ segir Gunnar Axel um þetta mál kom upp á yfirborðið í dag.

 

 



Flokkar:Hafnfirðingar

1 reply

Trackbacks

  1. BÆJARSTJÓRINN VISSI EKKERT UM RÓSUVIÐTALIÐ | Eiríkur Jónsson
%d bloggurum líkar þetta: