Vill að laun leikskólakennara endurspegli nám og ábyrgð

Óskar Steinn Jónínuson Ómarsson, formaður Bersans – Ungra jafnaðarmanna í Hafnarfirði, segir það vera algjör forréttindi að vinna með börnum og hvetur samfélagið til að meta leikskólakennara að verðleikum og hækka laun þeirra. Þetta segir hann í færslu á Facebook í dag, í tilefni þess að hann var að hætta sem leiðbeinandi á leikskólanum Hvammi.

Óskar Steinn segir laun leikskólakennara allt of lág miðað við lengd kennaranáms og ábyrgðina sem starfinu fylgir. „Allir sem hafa kynnst því magnaða starfi sem fram fer á leikskólum vita að þessi stétt á betra skilið,“ segir hann enn fremur og lofar því að berjast fyrir hærri launum leikskólakennara.

Færsla Óskars Steins:

Ég hóf fyrst störf á leikskólanum Hvammi í maí 2013. Klukkan 16:00 í dag stimpla ég mig út í
síðasta sinn (í bili, allavega).

Ég kveð þennan vinnustað með söknuði og trega. Ég er svo þakklátur fyrir að hafa kynnst þessu yndislega starfi og fengið að vinna með litlu krílunum. Það eru algjör forréttindi. Ég mæli með þessu starfi fyrir alla, sérstaklega karlmenn. Það er svo mikilvægt fyrir samfélagið okkar og jafnréttisbaráttuna að börn fái fyrirmyndir af öllum kynjum.

Ég hef kynnst svo mikið af mögnuðum kennurum og öðru starfsfólki á Hvammi. Þetta er að mínu mati mikilvægasta fólkið í íslensku samfélagi. Fólkið sem heldur utan um börnin okkar meðan foreldrarnir vinna. Kennir þeim allt milli himins og jarðar og hjálpar þeim að þroskast og dafna á sínum eigin forsendum. Kennir þeim að bera virðingu fyrir sjálfum sér, náunganum og umhverfinu. Æfir þau í samskiptum, jafnrétti og að þekkja sínar eigin tilfinningar.

Leikskólakennarar eru sömuleiðis vanmetnasta fólkið í íslensku samfélagi. Þetta endurspeglast í launum leikskólakennara, en samkvæmt kjarasamningi Félags leikskólakennara og Sambands íslenskra sveitarfélaga eru byrjunarlaun leikskólakennara með 5 ára háskólanám 441 þúsund krónur á mánuði fyrir skatt. Það eru 275 þúsund útborgaðar. Miðað við lengd kennaranámsins og ábyrgðina sem starfinu fygir eru þessi laun allt of lág og allir sem hafa kynnst því magnaða starfi sem fram fer á leikskólum vita að þessi stétt á betra skilið.

Leikskólar landsins eru langt frá því að ná því viðmiði að ⅔ starfsfólks sé fagmenntað. Mikil
mannekla er sömuleiðis í grunnskólum og á frístundaheimilum. Við verðum, sem samfélag, að meta fólkið sem vinnur með börnunum okkar að verðleikum. Það þarf að vera eftirsótt að vinna þessi störf. Til þess þarf m.a. hærri laun og hugarfarsbreytingu.

Það mikilvægasta sem við getum gert í þessu lífi er að vera góð við börn. Það skiptir máli upp á hvernig samfélag við viljum sjá í framtíðinni. En við þurfum líka að vera góð við fólkið sem vinnur með börnunum og láta laun þess endurspegla þá ábyrgð sem starfinu fylgir og þá virðingu sem við berum fyrir því. Fyrir því mun ég berjast alla tíð.



Flokkar:Uncategorized

%d bloggurum líkar þetta: