Ungu fólki á að líða vel í eigin skinni

Hafnfirsk ungmenni fá fræðslu Samtakanna ’78 á nýju ári.

Hafnfirsk ungmenni fá fræðslu Samtakanna ’78 á nýju ári.



Eva Lín Vilhjálmsdóttir er hafnfirskur ungur jafnaðarmaður. Hún var 19 ára þegar hún sat sinn fyrsta bæjarstjórnarfund og er líklega yngsti einstaklingurinn til að koma inn í bæjarstjórn. Hún stendur að baki umdeildri tillögu um eflingu hinseginfræðslu í grunnskólum bæjarins.

Eva Lín Vilhjálmsdóttir sat sinn fyrsta bæjarstjórnarfund fyrir Samfylkinguna í Hafnarfirði síðastliðið vor. Þegar hún lagði fram tillögu um eflingu hinseginfræðslu í grunnskólum bæjarins, óraði hana ekki fyrir þeim harkalegu viðbrögðum sem fylgdu í kjölfarið. Nú liggur endanleg útfærsla hinseginfræðslunnar fyrir og samningur Hafnarfjarðarbæjar við Samtökin ’78 í höfn. Bærinn okkar ræddi við Evu Lín og spurði hana hvaða augum hún lítur niðurstöðuna.

„Ég er mjög ánægð. Það er nauðsynlegt að fræða börn og unglinga um að fjölbreytt fjölskyldulíf sé í lagi og að þau þurfi ekki að skammast sín fyrir kynhneigð sína eða kynvitund. Það er mikilvægt að öllu ungu fólki líði vel í eigin skinni“.

REGNBOGIEndanleg útfærsla á tillögu Evu er í fjórum liðum:

– Samtökin ’78 veiti starfsfólki grunnskólanna fræðslu um kynhneigð, kynvitund og málefni intersex fólks.
– Hafnfirsk ungmenni fái aðgang að ráðgjöf Samtakanna ’78 án endurgjalds.
– Samtökin ’78 annist fræðslu fyrir alla nemendur í 8. árgangi grunnskóla Hafnarfjarðar.
– Samtökin ’78 veiti Hafnarfjarðarbæ ráðgjöf við námskrárvinnu um kynhneigð, kynvitund og málefni intersex fólks.

Eva Lín telur að þetta vera mjög mikilvægt skref fyrir bæinn. Hún vill að fleiri sveitarfélög fari sömu leið og Hafnarfjarðarbær svo öll börn og ungmenni fái þessa mikilvægufræðslu og ráðgjöf.Tillagan vakti mikla athygli og umræðan um hana kom mörgum á óvart. Bjóst Eva Lín við svona ofsakenndum viðbrögðum?

„Viðbrögðin við tillögunni komu mér ekki mikið á óvart, en umræðan á Útvarpi Sögu var fráleit. Hvernig datt fólki í hug að ég ætlaði að eðla mig fyrir framan börnin í einhvers konar sýnikennslu í hinseginfræðslu? Nemendur eru ekki krossfestir í kristnifræði“.

Eva Lín tók þátt í prófkjöri Samfylkingarinnar fyrir sveitarstjórnarkosningarnar í Hafnarfirði og hafnaði í 7. sæti. Hún varð varabæjarfulltrúi, líklega sá yngsti í sögu bæjarins. En af hverju ákvað hún að fara í prófkjör?

„Ég var búin að vera virk í Ungum jafnaðarmönnum í Hafnarfirði og vildi kynnast stjórnmálunum betur. Ég var alltaf að heyra að stjórnmálin skiptu engu máli og að allt gengi svo hægt í stjórnsýslunni svo ég vildi bara kynnast því sjálf“.

Eva Lín hefur mikinn áhuga á umhverfismálum og tók sæti fyrir Samfylkinguna í umhverfis- og framkvæmdaráði. Hún segir það að vissu leyti rétt að hlutirnir gangi stundum hægt í stjórnsýslunni en að það sé líka mjög auðvelt að hafa áhrif. Hún segir stemninguna í ráðinu góða, allir vinni vel saman þvert á flokka. Eva Lín er komin í pásu frá íslenskum stjórnmálum, en hún flutti til Kaupmannahafnar í byrjun nóvember. Þar ætlar hún að vinna fyrir sér fyrst um sinn og fara svo í háskóla næsta haust. En af hverju Köben?

„Ég bjó í Kaupmannahöfn þegar ég var yngri svo ég kann tungumálið vel og þekki aðeins til. Mig langar aðeins að breyta um umhverfi. Svo er eiginlega orðið það dýrt að búa á Íslandi að maður getur alveg eins farið út“. Bærinn okkar þakkar Evu Lín fyrir spjallið, óskar henni velfarnaðar í Kaupmannahöfn og vonast til að sjá hana sem allra fyrst aftur.



Flokkar:Uncategorized

%d bloggurum líkar þetta: