Heim › Uncategorized › Aldraðir og öryrkjar: færri fá afslátt af fasteignasköttum

Aldraðir og öryrkjar: færri fá afslátt af fasteignasköttum

By baerinnokkar on desember 4, 2015

Fylgi viðmiðin ekki almennri þróun tekna í samfélaginu fækkar þeim sjálfkrafa sem eiga rétt til að njóta afsláttarkjaranna.

Fylgi viðmiðin ekki almennri þróun launa í samfélaginu fækkar þeim sjálfkrafa sem eiga rétt til að njóta afsláttarkjaranna.

Bæjarráð Hafnarfjarðar fjallaði í vikunni um tillögu meirihlutans að breytingum á tekjuviðmiðum sem notuð eru til að ákvarða hverjir eigi rétt til afsláttar af fasteignasköttum. Annað árið í röð gera tillögur meirihlutans ráð fyrir að tekjuviðmiðin lækki að raungildi sem þýðir að færri og færri eiga rétt til afsláttarins.

Í síðustu fjárhagsáætlun meirihluta Bjartrar framtíðar og Sjálfstæðisflokks, þ.e. fyrir árið 2015, voru viðmiðin einungis hækkuð um 2,7% þrátt fyrir að laun hafi hækkað um tæplega 6% frá árinu á undan. Nú gerir meirihlutinn tillögu um að viðmiðin hækki um 4,5% á sama tíma og útlit er fyrir að laun muni hækka um rúm 8% frá fyrra ári. Fylgi viðmiðin ekki almennri þróun launa í samfélaginu fækkar þeim sjálfkrafa sem eiga rétt til að njóta afsláttarkjaranna.

Fulltrúar Samfylkingar og VG í bæjarráði lögðu til að viðmiðin yrðu látin fylgja launaþróun og ákvörðun síðasta árs yrði leiðrétt í samræmi við það. Fulltrúar meirihlutans tóku ekki afstöðu til tillögunnar en fólu bæjarstjóra að skoða málið fyrir síðari umræðu um fjárhagsáætlun sem fara á fram í næstu viku.

Það vekur athygli að í umsögn Öldungaráðs sem einnig var kynnt á fundinum hafi ekki verið gerð athugasemd við það að viðmiðin skuli vera lækkuð með þessum hætti annað árið í röð.