Fasteignaskattur hækkar um 21%

Fjárhagsáætlun meirihluta Bjartrar framtíðar og Sjálfstæðisflokks var til umræðu í bæjarstjórn í dag

Fjárhagsáætlun meirihluta Bjartrar framtíðar og Sjálfstæðisflokks var til umræðu í bæjarstjórn í dag

Fyrri umræða um tillögu meirihlutans um fjárhagsáætlun fór fram í bæjarstjórn Hafnarfjarðar í dag. Mikil leynd hefur ríkt um forsendur tillögunnar og fengu bæjarfulltrúar minnihlutans þær ekki afhentar fyrir fundinn eins og þeir eiga rétt á samkvæmt sveitarstjórnarlögum. Það eina sem bæjarfulltrúar fengu sent fyrir fundinn voru áætlaðar niðurstöðutölur án allra skýringa. Gerðu fulltrúar minnihlutans athugasemd við þetta vinnulag og óskuðu eftir því að farið yrði eftir ákvæðum sveitarstjórnarlaga og umræðunni frestað um viku svo bæjarfulltrúum gæfist ráðrúm til að eðlilegs undirbúnings. Í umræðum sagði Gunnar Axel Axelsson oddviti Samfylkingarinnar að ekki væri hægt að ætlast til uppbyggilegrar og upplýstrar umræðu í bæjarstjórn við slíkar aðstæður. Tillaga hans um að fresta umræðunni um eina viku var felld af fulltrúum meirihlutans.

Í netútgáfu Fjarðarpóstsins kemur fram að í tillögu meirihlutans felist meðal annars hækkun á fasteignaskatti úr 0,28% af fasteignamati íbúðarhúsnæðis í 0,34%. Hins vegar eigi þjónustugjöld fasteigna að lækka. Fasteignagjöld sem heimili greiða eru samsett úr fasteignasköttum annarsvegar og húsnæðistengdum þjónustugjöldum. Þessi gjöld eru vatnsgjald, fráveitugjald og sorphirðurgjald. Fasteignaskatturinn er álagður samkvæmt pólitískri ákvörðun og myndar stofn til fjármögnunar grunnþjónustunnar en þjónustugjöldin eiga aðeins að standa undir kostnaði við veitingu umræddrar þjónustu. Ef afgangur er af rekstri þessara þjónustuþátta á hann að skila sér til þjónustunotenda í formi lækkunar á þjónustugjöldum. Í stað þess að láta það gerast er gert ráð fyrir því í tillögu meirihlutans að fjárhagsáætlun að álagningarstuðull fasteignaskatts hækki úr 0,28% af fasteignamati í 0,34%.

Á Faceobooksíðu Gunnar Axel Axelssonar oddvita Samfylkingarinnar segir að í tillögum meirihlutans um forgansröðun í rekstri og þjónustu við bæjarbúa í Hafnarfirði felist ýmsar breytingar sem ekki hafi verið kynntar bæjarfulltrúum áður, m.a. veruleg hækkun á heimsendum mat til aldraðra, fækkun leikskólaplássa, lokun leikskólans við Hlíðarbraut (Kató), lokun skógardeildar leikskólans Víðivalla í Kaldárseli, niðurskurður þróunarsjóðs grunnskóla, hækkun á matargjöldum í leikskólum, samdrætti í framlögum vegna sérkennslu í grunnskólum og hækkun gjaldskráa m.a. í sundlaugum og í tónlistarskóla. Heildstætt yfirlit yfir tillögur meirihlutans hefur ekki verið birt opinberlega en í fréttatilkynningu sem send var frá Hafnarfjarðarbæ í dag er aðeins fjallað um niðurstöðutölur en hvergi vikið af forsendum tillögunnar frekar en í útsendum gögnum til bæjarfulltrúa.



Flokkar:Uncategorized

%d bloggurum líkar þetta: