Aðildarviðræður á dagskrá bæjarstjórnar

By baerinnokkar on mars 17, 2015

Tillagan er á dagskrá bæjarstjórnarfundar sem verður haldin á morgun miðvikudag. Fundurinn hefst kl. 14:00 og er hægt að fylgjast með honum í beinni útsendingu á netinu.

Bæjarstjórn Hafnarfjarðar kemur saman til fundar á morgun. Á dagskrá fundarins er tillaga að áskorun til ríkisstjórnar og Alþingis um að standa við gefin fyrirheit og tryggja aðkomu þjóðarinnar að ákvörðun um framhald aðildarviðræðna Íslands við Evrópusambandið.

Í tillögunni felst einnig að bæjarstjórn styðji samþykkt stjórnar Sambands íslenskra sveitarfélaga og hvetji Alþingi til að tryggja sveitarfélögunum í landinu svigrúm til að koma sjónarmiðum sínum á framfæri áður en til breytinga á stöðu aðildarviðræðna kemur.

Í greinargerð með tillögunni segir að samkvæmt greinargerð sem unnin hafi verið fyrir sveitarfélögin hér á landi sé ljóst að áhrif aðildar á þau yrðu umtalsverð. Þó sé ekki hægt að segja nákvæmlega fyrir um heildarávinning sveitarfélaga fyrr en niðurstöður aðildarviðræðna liggja fyrir.

Dagskrá bæjarstjórnarfundar og tillöguna í heild má nálgast hér.