Skorar bæjarstjórn á Alþingi?

esbisÁ fundi bæjarráðs sem haldin var í gær lögðu fulltrúar Samfylkingar og VG fram tillögu að áskorun bæjarstjórnar til Alþingis um að tryggja aðkomu þjóðarinnar að ákvörðun um framhald aðildarviðræðna Íslands að Evrópusambandinu. Samþykkti ráðið að vísa tillögunni til afgreiðslu í bæjarstjórn.

Tillagan er svohljóðandi:

Bæjarstjórn skorar á Alþingi að tryggja aðkomu þjóðarinnar að ákvörðun um framhald aðildarviðræðna Íslands að Evrópusambandinu. Í samræmi við gefin fyrirheit verði dregin til baka tillaga um að viðræðum verði slitið og ákvörðun um framhald þeirra sett í þjóðaratkvæðagreiðslu. Þannig getur ríkisstjórnin lagt sitt af mörkum til þess að skapa sátt í samfélaginu, unnið gegn sundurlyndi og tortryggni um leið og dregið er úr pólitískri óvissu í íslensku þjóðlífi. Sömuleiðis tekur bæjarstjórn undir samþykkt stjórnar Sambands íslenskra sveitarfélaga frá 28. febrúar sl. þar sem stjórnin hvetur til þess að Alþingi tryggi sveitarfélögunum í landinu ráðrúm til að koma sjónarmiðum sínum á framfæri vegna málsins.

Í greinargerð með tillögunni segir meðal annars að þrátt fyrir að fyrir liggi að áhrif aðildar á íslensk sveitarfélög yrðu umtalsverð þá sé ekki hægt að segja nákvæmlega fyrir um heildarávinning sveitarfélaga fyrr en niðurstöður aðildarviðræðna liggja fyrir. Þá hafi íslensk sveitarfélög, meðal annars Hafnarfjarðarbær, verið í forystu um aukið lýðræði og beina þátttöku kjósenda í stórum og mikilvægum ákvörðunum sem varða samfélagið í heild og hagsmuni þess. Þannig hafi bæjarstjórn Hafnarfjarðar á sínum tíma tryggt íbúum bæjarins beint og milliliðalaust lýðræði með því að setja inn í samþykktir bæjarins heimild til að setja þýðingarmikil mál í dóm kjósenda. Í greinargerðinni segir ennfremur að baki þeim breytingum hafi legið það grundvallarsjónarmið að undirstaða trausts sambands almennings og stjórnmála væri gagnkvæmni, að forsenda trausts almennings til stjórnmálanna sé að stjórnmálin treysti fólkinu. Þá telji bæjarstjórn að hér sé um svo stórt hagsmunamál að ræða að eðlilegt sé að þjóðin fái aðkomu að ákvörðun um framhald þess.

Málið er á dagskrá bæjarstjórnar í næstu viku. Fundargerð bæjarráðs má nálgast hér.



Flokkar:Þjóðmál

%d bloggurum líkar þetta: